Antimafia italiane në bashkëpunim me Shqipërinë dhe disa shtete të tjera, po zhvillojnë operacionin ndërkombëtar anti-drogë. Sipas asaj që raportojnë mediat italiane, operacioni është koduar në shqip, “Shpirti”. Në sajë të këtij operacioni janë lëshuar 38 urdhër-arreste, nga këta 10 persona të arrestuar më parë.
Mes të arrestuarve ka prokurorë, drejtues policie si dhe zyrtarë të lartë publik. Arrestimet po kryhen në Shqipëri, Itali, Spanjë dhe në Mal të Zi, dhe se është urdhëruar edhe konfiskimi i disa pasurive të luajtshme dhe të paluajtshme, që kapin vlerën e disa miliona eurosh. Operacioni antidrogë po zhvillohet nga Anti-Mafia italiane, SPAK dhe Policia e Shtetit.
Operacioni italo-shqiptar është rrjedhë e zhvillimeve hetimore të operacioneve “Shefi” e “Kulmi” ekzekutuar në 2018 e 2020 nga Drejtoria e Antimafias Italiane të Barit, ku u arrestuan 37 persona, u sekuestruan 40 milionë euro drogë, 4 milion euro asete si prona, automjete e para cash. Pritet që Prokurori i Antimafias italiane, De Raho dhe kreu i SPAK, Arben Kraja të zhvillojnë një konferencë për shtyp në orën 10:30, për të dhënë më shumë detaje në lidhje me këtë operacion të gjerë.
