Dy të rinj shqiptarë shpallen kampionë Italie me Empolin. Kristjan Asllani dhe Kleis Bozhanaj kanë ngritur trofeun në kampionatin e 19-vjeçarëve, pasi Empoli mposhti me rezultatin 5-3 Atalantën.
Një rrugëtim jo i lehtë, pasi më parë kishin kaluar me sukses Juventusin dhe Interin dhe dy shqiptarët kishin qenë protagonistë. Mesfushori Asllani edhe në finale la shenjë, pasi ishte ai që shënoi golin e parë të ndeshjes pas një goditjeje dënimi me dy pasime.
Numri 4 i Empolit goditi fort dhe e çoi topin në rrjetë. Festë e madhe te Empoli, që arriti të fitonte në fund dhe të festonte titullin kampion.
Për shqiptarin tjetër, Bozhanaj, këtë herë pati pak minuta, pasi u aktivizua vetëm në minutat shtesë. Megjithatë, sipas shtypit italian, dy të rinjtë shqiptarë, të lindur në Itali dhe me pasaportë italiane, shihen si dy futbollistë me të ardhme për në ekipet e para të Serisë A.
Kristjan Asllani, mesfushori me tipare sulmuesi i Empolit, është grumbulluar edhe nga trajneri Alban Bushi në Shqipëria U21.
