Një krim i rëndë tronditi Greqinë një muaj më parë, e ndërsa vdekja e Carolinës është ende me shumë pikëpyetje. Hetuesit duket se kanë vënë në dyshim vrasjen e kryer nga piloti grek Babis Anagnostopoulos. Ndonëse duket se krimi është zbardhur pas dëshmisë së 32-vjeçarit, grupi hetimor ka ende shumë pyetje të pasqaruara.
Duke iu feruar mediave greke, viktima 20-vjeçare ishte duke fjetur rreth orës 04:05 të mëngjesit ndërsa në 04:11, zemra e saj pushoi së rrahuri. Hetuesit duan të dinë se pse ajo nuk bëri rezistencë, dhe pse nuk ka shenja dhune në trupin e saj. Ekspertët mundohen të japin disa përgjigje, duke u nisur nga dëshmitë e bashkëshortit.
Fillimisht Babis deklaronte se Caroline po dridhej dhe se goja dhe hunda ishte nën jastëk dhe ja shtypi kokën. Në dëshminë e dytë ai thotë se goja dhe hunda ishin në jastëk dhe se ai e shtypi me peshën e trupit.
Në të dy rastet, ekspertët thonë se viktima do të duhej të bënte rezistencë. “Me forcë, ju i privoni personit frymëmarrjen. Kjo kërkon një veprim të zgjatur dhune, i cili nuk mund të konsiderohet si i menjëhershëm, ose që kjo dhunë të mos perceptohet nga autori”, pohon ekzaminuesi mjekësor Socrates Tsantiris.
Shpjegimi i vetëm që japin ekspertët është se Caroline duhet të ketë qenë e pavetëdijshme në momentet e krimit, pra viktima ka qenë në gjumë. Kjo hedh poshtë dhe një prej dëshmive të Babis, i cili thoshte se në kohën e vrasjes, studentja ka shfaqur sjellje agresive.
Për më tepër, variantin e ekspertëve e forcon më tej dhe fakti se në trupin e Carolines nuk kishte shenja dhune. Nëse autori i krimit, siç thonë ekspertët, “ka përdorur një leckë dhe jo duart për të shkaktuar humbjen e vetëdijes, ai nuk lë shenja fare”. “Mënyra se si ajo ndërroi jetë, nëse sqarohet plotësisht, mund të tregojë shumë për vrasësin”, shkruajnë mediat greke.
Piloti 32-vjeçar, i cili ka pranuar se ka vrarë gruan e tij në Glyka Nera të Greqisë, ka hedhur poshtë pretendimet e hetuesve për një krim të paramenduar. Ai ka kërkuar falje për krimin e rëndë, duke shprehur pendesë. “Me të vërtetë jam penduar për këtë akt, shkatërrova jetën time dhe familjen”, ka thënë ai.
