Bullgaria nuk ka lëshuar pe as në Këshillin për Punë të Përgjithshme, në këmbënguljen për të bllokuar fillimin e negociatave për Maqedoninë e Veriut.
Agjencia e lajmeve MIA, duke u mbështetur në burime diplomatike, njoftoi se debati për zgjerimin në takimin e ministrave në Luksemburg ka qenë intensiv lidhur me këtë temë. Sofjes i është thënë se kritikat në adresë të saj për këtë bllokim janë të shumta, shkruan Alsat.
Përfaqësuesi bullgar në takim, sipas MIA-s, ka thënë se “BE nuk e kupton thellësinë e problemit midis Shkupit dhe Sofjes”, se “kjo mosmarrëveshje është një çështje evropiane” dhe se “Bullgaria është në një situatë specifike për shkak të zgjedhjeve të ardhshme në korrik”.
Sidoqoftë, diplomatët evropianë ankohen se Bullgaria nuk mund të japë ndonjë garanci se do të zhbllokojë veton me një qeveri politike.
Vendet anëtare që mbështesin zgjerimin, edhe para takimit, janë deklaruar “pro” fillimit të negociatave duke ftuar BE-në të mos i marrë parasysh kontestet bilaterale. Gjermania mendon se BE-ja duhet patjetër të bëjë diçka në këtë drejtim.
