Ish-kryebashkiakja e Gjirokastrës, Zamira Rami, është dënuar nga Gjykata e Posaçme për ‘shpërdorim detyre’. Ajo është shpallur fajtore për akuzën e ‘shpërdorimit të detyrës’, pas denoncimit të bërë nga dy qytetarë, për prishjen e banesave të tyre, në kuadër të projektit të rilindjes urbane. Ajo u dënua me 1 vit burg, dënim që i konvertohet në shërbim prove.
Ish-kryebashkiakja e zgjedhur në 2015 nën logon e LSI-së, akuzohej nga Prokuroria e Posaçme se kishte shembur dy banesat në pronësi të dy personave, por më pas nuk i kishte dëmshpërblyer.
“…ka kryer veprime në kundërshtim me aktet ligjore në fuqi, duke prishur dy prona të ligjshme të shtetasve Dritan Sako dhe Teodorti Xhai dhe duke u shkaktuar atyre një dëm pasuror në vlerë 5 600 520 lekë”, thuhet në njoftimin e SPAK.
Projekti i Rikualifikimit të hapësirave publike pranë Memorialit të Rilindasve në Gjirokastër është financuar nga Komiteti i Zhvillimit të Rajoneve në mars 2016, në kuadër të Rilindjes Urbane.
Në vitin 2019, pronarët e banesave të prishura për shkak të zbatimit të dy projekteve denoncuan Ramin në Prokurorinë e Gjirokastrës për ‘shpërdorim detyre;, duke pretenduar se nuk ishin dëmshpërblyer. Më pas dosja u transferua për kompetencë në SPAK.
Zamira Rami u zgjodh në krye të Bashkisë Gjirokastër në vitin 2015, si përfaqësuese e LSI-së me 54.47 % të votave. Pas vendimit të opozitës për të bojkotuar zgjedhjet lokale të 2019, Rami nuk kandidoi për një mandat të dytë.
