Mbrëmjen e sotme kanë mbërritur në aeroportin e Rinasit 11,700 vaksina anti-covid, të prodhuara nga kompania Pfizer. Lajmin e ka bërë të ditur kryeministri Edi Rama, përmes një postimi në rrjetet sociale.
Rama u shpreh se deri më tani në vendin tonë, kanë mbërritur në total 967 mijë vaksina kundër koronavirusit.
“Aeroporti “Nënë Tereza” – 11,700 vaksina Pfizer sapo kanë mbërritur në Shqipëri, duke kaluar mbi 967 mijë sasinë e vaksinave të mbërritura deri tani. Vaksinimi nuk ndalet, Shqipëria buzëqesh”, shkruan Rama në Facebook.
Situata epidemiologjike në vendin tonë paraqitet e qëndrueshme, teksa në 24 orët e fundit janë regjistruar vetëm 2 raste të reja, nga 2.618 testime të kryera.
Ndërkohë, fatmirësisht nuk është regjistruar asnjë viktimë nga virusi gjatë kësaj periudhe kohore. Po në 24 orët e fundit, janë shëruar edhe 23 pacientë, teksa raste aktive mbeten 143.
Aktualisht, në spitalet COVID po trajtohen 20 pacientë, duke shënuar një ulje të ndjeshme.
