Eksperti i ushqimit, Adbyl Sinani, në një intervistë në “Wake Up” në Top Channel, dha disa këshilla të vlefshme pas panikut të krijuar lidhur me gripin e shpendëve. Ai iu drejtua konsumatorëve se mishin e pulës duhet ta ziejmë minimumi në 70 gradë, si dhe nuk duhet ta prekim me duar, pasi nuk e dinë nëse ka apo nuk ka virus.
“Kur të shohim një pulë që ka lot në sy, jashtëqitje si ujë dhe e trullosur, duhet që ta izolojmë atë. Jo vetëm atë, por edhe pulat e tjera. Nëse ne dimë zonat që i ka dhënë autoritetet përkatëse, atëherë nuk konsumojmë mishin e marrë atje. Autoriteti i ushqimit duhet të bëjë analizat. Virusi nuk e prek lehtë organizimin e njeriut, prek proteinën e pulës”, tha eksperti i ushqimit.
“Nëse e prekni me duar, aty është rreziku. Por nëse përdorni doreza, është në rregull”, tha më tej ai.
Aktualisht, informacionet zyrtare thonë se tre janë vatrat me gripin e shpendëve, në Dajt, Fushë-Krujë dhe një fshat në Tropojë. Gjithashtu është bërë e ditur se vijon hetimi epidemiologjik ku rolin kryesor e luan fermeri, i cili sapo i ngordh një shpend njofton veterinerin e zonës, më pas përcakton zonën e mbikëqyrjes. Eksperti i ushqimit, Adbyl Sinani, ka kërkuar nga të gjithë që të jenë më të kujdesshëm.
“Duke menduar se çfarë hoqëm nga Covid, tani duhet të jemi më të kujdesshëm. Kërkohet një kontroll edhe më i madh. Kohët e fundit është bërë një punë shumë e madhe në drejtim të kësaj.
Vetë konsumatori e di që mishi ruhet në një temperaturë të caktuar, e nëse temperatura është më e lartë në supermarketin ku e blen, atëherë kuptohet se mishit i kanë ikur disa proteina”, shtoi Sinani.
