Një tradhti e mundshme me një mësues, u kthye në ‘mollë sherri’ e më pas me një bilanc tragjik, ku burri i mori jetën gruas e më pas u vetëvar në Dragostunjë. 56-vjeçari Qemal Bici masakroi me sëpatë bashkëshorten e tij, Lumturie Bici, 53-vjeçe, e më tej i dha fund jetës duke u vetëvarur në pemë pranë banesës.
Krimi makabër ndodhi pasditen e së hënës, pas rreth 30 vitesh martesë të çiftit. Sipas burimeve, autori i krimit dyshonte se gruaja e tij e tradhtonte me një mësues, i cili dikur kishte punuar si drejtor shkolle në fshatin Dragostujë.
Më pas, arsimtari u transferua në një shkollë tjetër të Librazhdit, si mësues i thjeshtë. Pavarësisht transferimit, konfliktet midis çiftit nuk kishin ndalur.
Ka qenë djali i çiftit, i cili ka gjetur nënën të masakruar në shtëpi, dhe më pas babanë të varur në pemë.
Çifti kishin 4 fëmijë dhe trupat e pajetë u gjetën nga djali 20-vjeçar, i cili ka parë prindërit e vdekur kur ka mbërritur në shtëpi, ndërsa ka lajmëruar dhe policinë. 3 fëmijët e tjerë të çiftit, jetojnë jashtë shtetit.
