Detaje tronditëse janë zbardhur pas ngjarjes së rëndë me një të plagosur në gjendje të rëndë dhe një të vdekur. Babë e bir u qëlluan me armë mbrëmjen e djeshme në lokalin në pronësi të tyre nga një person, i cili tashmë është vënë në pranga. Ngjarja e rëndë ka ndodhur në Krutje të Lushnjes, në lokalin e të ndjerit Rako Qorri 62-vjeç, i cili ka gjetur vdekjen e menjëhershme. Ndërsa djali i tij Kejdi Qorri, 31 vjeç, ndodhet në gjendje të rëndë për jetën.
Sipas të dhënave jo zyrtare, shkak i ngjarjes është bërë një debat i çastit në lokal midis autorit dhe viktimës, debat i cili ka përfunduar në përplasje fizike.
Mësohet se sherri ka nisur për rakinë. Ka qenë Sofokli Shani që ka qëlluar me karrige kokës Rako Qorrin. Djemtë e Rakos janë përgjigjur, duke rrahur Sofokliun. Pas kësaj, ky i fundit ka shkuar në banesë, ka marrë armën dhe ka kryer vrasjen.
Autori, pasi ka kryer krimin është larguar nga lokali dhe është vetëdorëzuar në polici, bashkë me armën e krimit.
