“E festojnë sot të gëzuar 1 Qershorin, falë mundësive që i keni dhënë ju!”. Ky ka qenë urimi i Drejtorit Ekzekutiv i fondacionit “Fundjavë Ndryshe”, Arbër Hajdari, drejtuar shqiptarëve, në Shqipëri e kudo nëpër botë, teksa ka festuar në ambientet e fondacionit me shumë prej atyre fëmijëve që falë ndërhyrjeve të ndryshme kirurgjikale, tashmë i janë bashkuar bashkëmoshatarëve në udhën e tyre të përditshmërisë.
Janë më shumë se 100 operacione të suksesshme, të kryera të gjitha nën kujdesin e fondacionit “Fundjavë Ndryshe”, që e kanë kthyer prej kohësh fondacionin në një nga dritaret e shpresës për shumë familje shqiptare, të cilët do ta kishin të pamundur ndjekjen dhe realizimin e ndërhyrjeve kirurgjikale, të cilat janë edhe të vështira edhe të kushtueshme.
“Sot kaluam një ditë të bukur me disa prej fëmijëve. Gëzuar festën tuaj të dashur fëmijë! Gëzuar 1 Qershorin!”, shkruante Hajdari në faqen e “Fundjavë Ndryshe”, i rrethuar nga fëmijët që sot gëzojnë shëndet falë mbështetjes së shqiptarëve, pas thirrjes që ky fondacion u ka bërë për ta. /TIRANA TODAY
