Kryetari në detyrë i Partisë Demokratike, Lulzim Basha ka refuzuar sërish ftesën e kryeministrit Edi Rama, për bashkëpunim. Nga Divjaka, ku zhvilloi një takim me demokratët, në kuadër t ë zgjedhjeve të brendshme të 13 qershorit, Basha u shpreh se nëse pranon ftesën e Ramës, bëhet ortak në vjedhjen e zgjedhjeve.
Sipas tij, pretendimet e Ramës për reformë zgjedhore pasi i ka vjedhur zgjedhjet, do të thotë se ai ka frikë dhe tmerr nga opozita, dhe veçanrësisht nga Partia Demorkatike.
Ndër të tjera, Basha u bëri thirrje demokratëve për bashkim, për të luftuar Ramë, të cilin ai e quan armiku i demorkacisë.
Lulzim Basha: ”Dora e shtrirë për bashkëpunim pasi ke vjedhur zgjedhjet, do të thotë të bëhesh ortak në vjedhje. Pretendimet për reformë zgjedhore pasi ke vjedhur zgjedhjet, tregojnë jo thjesht tmerr dhe ankth, po dhe analfabetizmin politik të atyre që i kemi përballë.
Modeli ynë ka triumfuar. Ata që na kritikojnë sepse vazhdojmë të tregojmë me gisht modelin e kriminalizimit të kundërshtarit tonë, të shkrirjes të pushtetit me partinë, ata që na konsiderojnë demode, në fakt nuk bëjnë gjë tjetër veçse shërbimin më të drejtpërdrejt të kundërshtarit tonë.
Ata duhen injoruar, duhen përbuzur dhe duhen lënë në mjerimin e tyre personal. Lufta totale kundër demokracisë, kërkon që e gjithë vëmendja jonë të jetë ndaj armikut numër një të demokracisë, armikut numër një të mirëqenies të shqiptarëve që është regjimi i Edi Ramës i dal nga tjetërsimi i vullnetit të shqiptarëve më 25 prill.’’
