Poilicia ka bërë të mundur zbardhjen e ngjarjes së ndodhur mbrëmjen e djeshme në qytetin e Vlorës, ku 39-vjeçari Ergys Likaj u plagos me armë zjarri.
Uniformat blu kanë identifikuar autorin e kësaj ngjarjeje, Ersiljo Mataj, i cili është shpallur në kërkim. 18-vjeçari akuzohet për veprat penale “Plagosje e rëndë me dashje” dhe “Armëmbajtja pa leje”.
Njoftimi i policisë
Zbardhet ngjarja e ndodhur mbrëmjen e djeshme në lagjen “Uji i Ftohtë” ku u plagos me armë zjarri një 39-vjeçar. Identifikohet dhe shpallet në kërkim autori i dyshuar i ngjarjes.
Specialistët për Hetimin e Krimeve në Komisariatin e Policisë Vlorë, nën drejtimin e Prokurorisë në vijim të veprimeve hetimore të kryera për zbardhjen dhe dokumentimin e ngjarjes së ndodhur mbrëmjen e djeshme, ku u plagos me armë zjarri shtetasi E. L.
Bazuar në provat e grumbulluar u bë i mundur identifikimi dhe shpallja në kërkim e autorit të dyshuar të ngjarjes shtetasit E. M., 18 vjeç, banues në Vlorë, për veprat penale “Plagosje e rëndë me dashje” dhe “Armëmbajtja pa leje”.
Materialet i kaluan Prokurorisë pranë Gjykatës së Shkallës së Parë Vlorë, për veprime të metejshme.
Mësohet se 18-vjeçari në fjalë ka kërkuar ta takojë 39-vjeçarin, pasi është dërguar nga dikush tjetër për t’i dhënë një mesazh.
Në momentin që e ka takuar, Mataj i ka dhënë Likajt një telefon dhe në anën tjetër të telefonit ka folur një i afërm i tij që ndodhet në qelinë e burgut.
Pasi Likaj ka mbyllur bisedën me personin në telefon, është goditur dy herë nga këmbët me armë nga Mataj.
