Kandidati për kreun e PD, Agron Sheahj nuk beson se Lulzim Basha do ta përjashtojë nga grupi parlamentar, nëse ky i fundit zgjidhet sërish kryetar më 13 qershor.
I ftuar në emisionin ”Frontline” në ”News 24”, Shehaj u shpreh se gara e ndihmon Partinë Demorkatike, dhe nëse vazhdohet me të njëjtën mënyrë siç është bërë deri më sot, do jetë e pamundur që kryeministri Edi Rama të mundet.
Ndër të tjera, ai tha se nuk kandidon për inat apo ngaqë po tradhton Bashën, teksa shtoi se është futur në politikë, pasi mendon se Shqipëria duhet ndryshuar.
Agron Shehaj: ”Nuk besoj. Në momentin që i futem kësaj gare, i marr parasysh dhe anët negative që mund të sjellë, por nuk besoj se do të kem përjashtim apo marrje masash. Unë mendoj që gara e ndihmon PD. Të mendosh që kandidimi im dëmton PD, është qesharake, nuk bën sens. I bie që në të gjitha partitë perëndimore, ku ka garë të vërtetë, ai që nuk fiton, ka pasur qëllim të dëmtojë partinë.
Në këtë mënyrë, PD e ka të pamundur të mundë Edi Ramën. Nëse nuk ka garë, nuk ka konkurrencë, PD e ka të pamundur të fitojë zgjedhjet e ardhshme. Unë nuk kam asnjë qejfmbetje me kryetarin e PD, thjesht kam një bindje dhe në bazë të saj veproj. Nuk e bëj as për inat, as për tradhti. Jam futur në politikë, sepse mendoj që Shqipëria duhet ndryshuar, i duhet dhënë fund tranzicionit 30-vjecar, dhe për këtë duhet reformuar PD. Po nuk bëmë PD një parti perëndimore, nuk do ta bëjmë dot kurrë Shqipërinë perëndimore.”
Më 13 qershor, Partia Demokratike zhvillon zgjedhjet për kryetarin e ri. Përballë Lulzim Bashës, do të garojnë Edith Harxhi, Agron Shehaj dhe Fatbardh Kadilli.
