Zëvendës president i Komisionit Europian për Marrëdhëniet Ndërinstitucionale, Maros Sefcovic mbajti fjalën e tij në konferencën e Këshillit për Çështjet e Përgjithshme në BE.
Duke u ndalur te hapja e negociatave me Shqipërinë dhe Maqedoninë e Veriut, Sefcovic u shpreh se po punohet me të dyja vendet, në mënyrë që të zhvillohet sa më shpejt mbajtja e konferencës ndërqeveritare.
Sefcovic vuri theksin te shteti i së drejtës, si një nga parametrat kryesorë që do të përcaktojnë hapjen e negociatave, për të dyja vendet ballkanike.
Maros Sefcovic: ”Mund të theksoj se nga ana e komisionit po punojmë shumë që të dyja vendet të mund të zhvillojnë konferencën e parë ndërqeveritare sa më shpejt të jetë e mundur. Zgjerimi është një proces mjaft kërkues. Ne i kemi dhënë rëndësi të veçantë shtetit të së drejtës dhe të gjitha çështjeve të ndjeshme që duhen vendosur në negociata, me ato i mbyllim kapitujt. Mendoj se shteti i së drejtës do jetë parametri kryesor për negociatat. Duhet të japim një sinjal pozitiv për Ballkanin Perëndimor dhe shpresoj shumë që brenda presidencës portugeze të mbahet konferenca e parë”.
