Shqipëria po lë pas valën e dytë dhe më të ashpër të koronavirusit, teksa sipas specialistëve, pozitiviteti nga infektimet e reja këtë periudhë ka rënë nën 20%, duke zbritur nga kulmi që u shënua në fillim të marsit.
Për epidemiologun Ilir Alimehmeti, përmirësimi i situatës po reflektohet edhe në uljen e shtrimeve në spital dhe të humbjeve të jetës.
Në një intervistë për A2CNN, Alimehmeti u shpreh se kjo situatë nuk duhet të na çojë në mosrespektim të masave, veçanërisht pas ngrohjes së motit.
“Ne vijojmë të kemi vatra, pasi masat i kemi për të gjithë njësoj, ndërkohë që këto masa nuk i prekin të gjithë njësoj. Kështu që, duhet të jemi të qartë në këtë drejtim. Është koha e masave elegante, ka ardhur koha e bisturisë dhe ka ikur koha e sharrës”, tha Alimehmeti.
