Zbardhen të tjera detaje në lidhje me ekzekutimin e Edmond Koçit, i njohur ndryshe si Mond Çekiçi, mëngjesin e sotëm në Durrës.
Shoferi i tij ka dhënë dëshminë për autoritetet policore, teksa ka rrëfyer se autorët ishin tre persona, të maskuar me kapuça dhe shall.
Ai është shprehur se prej pak kohësh punonte si shofer i Çekiçit dhe se nëse do të kishte qëndruar edhe pak në vendngjarje, do të ishte ekzekutuar.
”Nuk i kam parë , nuk i njoh kush ishin. Unë kisha pak kohë shofer i Mondit. Në mengjes pranë shtëpisë së babait të Mondit na preu rrugën një makine e zezë Benz. Ata ishin të maskuar me kapuça dhe shall. Dola menjëherë nga makina dhe ika me vrap tek rrugica ngjitur që është aty ku kishim ndaluar. Po të kisha qëndruar do më kishin vrarë edhe mua. Unë nuk di kush ka patur konflikt me Mondin.”, tha ai.
Mond Çekiçi konsiderohej nga policia e Durrësit si person me rrezikshmëri të lartë, pasi ishte pjesë e një grupi kriminal në Durrës, si dhe miku i Lulzim Berishës.
Ai rezulton të jetë dënuar disa herë për akuzën e mbajtjes pa leje të armëve dhe kundërshtimit të forcave të policisë, duke u dënuar edhe me 2 vite burgim për armëmbajtje pa leje.
