Në Kinë aty ku u dhanë sinjalet e para me virus, ka ndodhur një rast tjetër i çuditshëm. Bëhet fjalë për mijëra kuti me akullore, të cilat kanë rezultuar të kontaminuara me virusin Covid-19. Paraprakisht dyshohet që akullorja të jetë kontaminuar me Covid-19 nga kontakti me një person të vetëm.
Referuar rastit në fjalë, autoritetet shëndetësore kanë nisur gjurmimin e personave që mund të jenë në rrezik infektimi. Rasti ka ndodhur në Tianjin, në pjesën verilindore të Kinës.
Sipas medias kineze “China Daily”, rreth 4836 kuti me akullore kanë rezultuar të kontaminuara me koronavirus. Nga këto, 2089 janë mbyllur në një magazinë.
1812 kuti të tjera u dërguan në provinca të ndryshme të vendit, nga të cilat 935 u hodhën në treg dhe vetëm 65 u shitën.
Blerësit e këtyre kutive me akullore u kontaktuan nga autoritetet shëndetësore kineze dhe ju është kërkuar që të deklarojnë të gjitha lëvizjet e tyre, me qëllim që të gjurmohen infeksionet e mundshme. Po të njëjtat burime shtojnë se 1162 punonjës të kompanisë së akulloreve janë izoluar, dhe i janë nënshtruar testimit anti-covid.
