Në një konferencë për mediat, kryeministri Rama u ndal tek përmbytjet në vend, duke thënë që jemi përmisuar në krahasim me vitet e kaluara. Gjatë fjalës së tij, ai e vuri theksin tek puna dhe reforma e bërë që kanë dhënë rezultatin e pritur për çështjen shqetësuese të përmbytjeve pas reshjeve të shumta. Kreu i qeverisë u shpreh i bindur për fitoren për një mandat të tretë, duke thënë se do të mbyllë kapitullin e frikës së shkarkimit të hidrocentraleve me ndërtimin e Skavicës. “Bazuar në reshjet e fundit që kemi hasur këtë herë dhe krahasuar me situatën katastrofike që kemi kaluar, do ju sjellim shifrat që tregojnë punën dhe investimet e mëdha të përditshme lidhur me këtë punë, në sektorin e kullimit, që lidhet me reformën që ende vazhdon por që e ka dhënë rezultatin e parë të gjithë strukturës së Emergjencave Civile.
Kjo lidhet me rritjen në një nivel tjetër të shtetit. Kur them shtetit, nga ministri përkatës e deri te kryeplaku i çdo fshati. Mos harrojmë punën e bërë nga strukturat nga pushteti vendor. Situata ka qenë kritike nga Liqeni i Shkodrës deri poshtë në Vjosë.
Përballimi i saj ka qenë për të marrë frymë të lehtësuar dhe për të nxjerrë mësime të tjera për të parë se çfarë duhet të përmirësojmë. Është e pakrahasueshme situata e përmbytjeve në të shkuarën dhe situata sot.
Janë të pakrahasueshme faktet e shifrat dhe kjo lidhet me punën e bërë. Çfarë vjen nga lart nuk e kemi në dorë, po sa jemi poshtë ta lehtësojmë atë që vjen nga lart, e kemi ne në dorë. Ndërtimi i Skavicës, që e kemi futur në proces, e do të jetë realitet në mandatin e ardhshëm, do të mbyllë kapitullin e frikës nga shkarkimi i hidrocentraleve. Do bëjmë që çdo pikë uji të mos harxhohet po të kthehet në energji”, tha Rama.
