Ish-deputeti i Partisë Demokratike, Romeo Gurakuqi ka paditur në gjykatë për shpifje ish-presidentin Bujar Nishani, pasi ky i fundit ditën e djeshme e akuzoi si ish-sigurims.
Debati nisi pasi Gurakuqi sulmoi anëtarët e Komitetit të Vlerësimit të PD-së, pas skualifikimit nga gara si kandidat për deputet, por i menjëhershëm ishte edhe reagimi i Nishanit që e quajti spiun, shpifës e llaxore korridorësh.
Ndërkohë, ditën e sotme në një intervistë për Report Tv, Gurakuqi se Nishani, si anëtar i Komisionit të Vlerësimit të kandidatëve për deputet, ka shkelur rregullat kryesore, e për këtë duhet të ndëshkohet.
Ndëshkimi, sipas tij është të përjashtohet nga anëtarësia e PD-së, pasi nuk meriton të jetë as anëtar i thjeshtë.
“Nuk meriton më të jetë as anëtar i thjeshtë në PD, për shkak të sabotimit dhe të sjelljes staliniste, minuese të interesave të PD, 4 muaj para zgjedhjeve godet drejtuesit politik të PD në Shkodër. Nuk ka gjë që më ndal përveç faljes publike. Rruga e PD me Bujar Nishanin nga ky moment ka filluar të ndahet dhe besoj se drejtuesit e PD do kenë pjekurinë e mjaftueshme për t’i treguar vendin atyre që kanë thyer të gjitha rregullat. Jam anëtar i PD, kur Nishani ka qenë Komisioner i Ramiz Alisë.
Ndërhyrjet kanë ardhur nga keqpërdorimi i pushtetit, të jesh anëtarë është një pushtet dhe i është dhënë njerëzve që kanë qenë kritik ndaj nesh, dhe nuk përjashtoj veten .Njerëz që kanë qenë në pushte dhe kanë abuzuar me pushtetin nuk kanë të drejtë të kritikojë. Ju besoni se kanë bërë matje. Mendoj se jo, nuk e kanë as vullnetin. Jam një prej deputetëve që kam qëndruar pranë zgjedhësve të mi, nuk kam lënë cep të Shkodrës pa shkuar. E kam diskutuar më Bashën, ka qenë rigoroz në ndjekjen e rregullave, kush nuk ka respektuar rregullave do të përgjigjet brenda PD”, tha Gurakuqi.
