Ministri i Brendshëm, Sandër Lleshaj ka shuar heshtjen, duke reaguar për ekzekutimin e 25-vjeçarit Klodian Rasha nga efektivi i Policisë së Shtetit. Një ditë pas ngjarjes së rëndë që ka tronditur mbarë vendin, Lleshaj thotë se ngushëllimi më i madh për familjarët do të jetë zbardhja e të vërtetës.
Ndër të tjera, ai shkruan se ka besim që organet ligjore do të zbardhin të plotë ngjarjen, për të cilën shprehet se ka nevojë për qartësim të plotë.
Ministri e mbyll mesazhin duke vënë në dukje se sot të gjithë kanë nevojë për qartësimin e plotë të rrethanave, që sollën këtë ngjarje tragjike. Kësisoj, autoritetet përgjegjëse ligjore duhet të përmbyllin sa më shpejt detyrën e tyre, në shërbim të së vërtetës dhe të drejtësisë.
Familjarët, miq, të afërm i kanë dhënë sot lamtumirën e fundit Klodianit, i cili u qëllua mbrëmë pak pas mesnate nga një efektiv i patrullës, pak metra larg banesës së tij.
Klodian Rasha u qëllua nga efektivi i policisë dhe gjeti vdekjen e menjëhershme, pasi nuk iu bind urdhrit të tij për të ndaluar, ndërsa kishte shkelur orën policore.
Statusi
E VËRTETA ËSHTË NGUSHËLLIMI MË I MADH
Ka shumë arsye se përse e ndjej fort se çfarë do të thotë humbja e Klodian Rashës për prindërit dhe familjarët e tij. Në këto çaste të hidhërimit të madh, u shpreh atyre ngushëllimet e mia më të thella për këtë humbje tragjike.
Në të njëjtën kohë, shpreh besimin tim të plotë se organet ligjore përgjegjëse do të finalizojnë shpejt, saktë, drejt dhe jashtë çdo ndikimi hetimet për vrasjen e Klodian Rashës.
Kjo ngjarje ka prekur shumë njerëz, të afërm të viktimës, qytetarë të zakonshëm, pjesëtarët e Policisë së Shtetit dhe gjithë të tjerët.
Sot të gjithë kanë nevojë për qartësimin e plotë dhe shterues të rrethanave që sollën këtë ngjarje tragjike dhe autoritetet përgjegjëse ligjore duhet të përmbyllin sa më shpejt detyrën e tyre në shërbim të së vërtetës dhe të drejtësisë.
