Kur nisi pandemia, mjekët dinin shumë pak se si të kujdeseshin për pacientët, përfshirë ata që mund të kishin rrezikun më të madh të sëmureshin me rëndë nga koronavirusi.
Ndaj studiuesit në të gjithë botën, morën në dorëzim të gjitha të dhënat që po mblidhnin nëpër spitale mjekët mbi pacientët e tyre me Covid-19, për të kuptuar se cilat tipare dhe cilësi mund të parashikojnë se në çfarë forme do sëmuren individët.
Dhe një nga elementët më të hershëm te pacientit që nisi të vlerësohet, ishte grupi i gjakut. Ndonëse mund të ketë një lidhje të lehtë midis disa llojeve të gjakut dhe gjasave për t’u sëmurur rëndë apo edhe për të vdekur nga COVID-19, ajo marrëdhënie nuk është aq e fortë sa të garantojë epërsinë e disa pacientëve mbi të tjerët, bazuar në atë që thotë grupi i tyre i gjakut.
Në pjesën më të madhe, studimet që vlerësojnë ashpërsinë e simptomave të Covid-19 dhe grupin e gjakut, fokusohen tek grupet e gjakut A, B, AB ose O. Këto etiketa u referohen llojeve të antigjeneve – proteina që e nxisin një përgjigje imune – të cilat ndodhen në sipërfaqen e të gjitha qelizave në trupin e dikujt.
Ndërsa llojet e gjakut janë të lehta për t’u identifikuar dhe analizuar, ato njiheshin që më parë se ndikonin tek mënyra se si njerëzit reagojnë ndaj sëmundjeve të tjera. Për shembull një lloj grupi i gjakut O, ishte e lidhur me një rrezik më të ulët të prekjes nga virusi i SARS.
Ndërsa ata që kanë grupin e gjakut A, mund të jetë më të rrezikuar të preken nga Hepatiti C. Për të parë nëse ekzistojnë lidhje të ngjashme për SARS-CoV-2, ekipet kërkimore në Kinë, Suedi, SHBA dhe vende të tjera, vëzhguan se si po përballeshin pacientët me grupe të ndryshme të gjakut.
Majkëll Hultstrom, një mjek i kujdesit intensiv në Universitetin e Upsalas në Suedi dhe ekipi i tij, zbuloi se pacientët me grupin e gjakut AB dhe A, ishin më të rrezikuar të vdisnin nga Covid-19. Në Nju Jork, një grup tjetër studiuesish ekzaminuan pacientë të tjerë me Covid-19 të shtruar në spital.
Por ata zbuluan disa gjëra paksa më ndryshe. Ndërsa ata me grupin e gjakut AB kishin një rrezik disi më të lartë për të vdekur nga koronavirusi, njerëzit me grupin e gjakut A, kishin një rrezik pak më të ulët për të t’u intubuar.
Përveç mospërputhjeve, ndryshimet e gjetura midis grupeve të gjakut kanë qenë deri tani relativisht të vogla. Për shembull, në analizën e Nju Jorkut, gjaku i tipit A kishte rreth 17.3 për qind rreziku për intubim, ndërsa gjaku i tipit O kishte rreth 20.3 për qind të rrezikut, tek pacientët që tashmë ishin shtruar në spital me Covid-19.
Diferenca e rrezikut midis secilit grup gjaku për intubim, ishte vetëm 2.9 për qind. Sa i përket rrezikut të vdekjes, gjaku i grupit AB kishte një rrezik prej 1.4 për qind më të lartë se ai O. Ka të ngjarë që disa nga ndryshimet që kanë zbuluar studimet midis grupeve të gjakut, të vijnë edhe për shkak të statusit socio-ekonomik të pacientëve.
Në varësi të prejardhjes së dikujt, ata mund të kenë më shumë të ngjarë të kenë një grup gjaku dhe jo një tjetër. Ekziston gjithashtu mundësia që modelet që duket se lidhin rrezikun e Covid-19 me lloje të caktuara të grupit të gjakut, lidhen me procese biologjike më komplekse.
“Ka të ngjarë që virusi vepron në mënyra, që ne nuk i kuptojmë ende plotësisht, dhe që janë përtej edhe vetëm grupit të gjakut”, thotë Majkëll Zitz, bashkautor i studimit në Nju Jork.
Për shembull, grupi i gjakut përcaktohet nga një gjen i vetëm. Por e njëjta e ADN-së mund të formojë karakteristika të tjera biologjike. Kjo do të thotë që lloji i gjakut në vetvete, mund të mos ndikojë në ndryshimet mbi pasojat e Covid-19 tek një njeri apo tjetri.
Përkundrazi, agjenti përgjegjës mund të jetë një tjetër ndryshim trupor që shkon dorë për dore me një grup gjaku A, B, AB ose O. Çfarëdo gjëje që të shpjegojë se si grupi i gjakut mund të lidhet me Covid-19, studiuesit nuk e kanë identifikuar ende atë. Ndoshta proteinat sipërfaqësore të llojeve të caktuara të grupeve të gjakut, lidhen me mirë me SARS-CoV-2, një teori kjo që është propozuar nga Hultstrom dhe të tjerët. Ose meqë disa nga të prekurit me Covid-19 zhvillojnë mpiksje të gjakut, ndoshta kjo ndikon gjithashtu edhe në formën e infeksionit.
Burimi i lajmit: https://www.discovermagazine.com/health/what-blood-type-has-to-do-with-covid-19-risk
Përshtatur nga TIRANA TODAY
