Për mjekun, Erion Dasho ajo çka po ndodh me situatën epidemiologjike në vend, është një tragjedi në zhvillim të plotë.
Sipas tij, kur numri i vdekjeve nga COVID ka arritur 15-20 çdo ditë, kjo do të thotë se numri i rasteve është diku midis 4 dhe 5 mijë në ditë.
Por, nëse nga këto raste arrihet të zbulohen vetëm 700-800, Dasho shpehet se kjo do të thotë që nuk testohet aq sa duhet.
Dasho shkruan në rrjetet sociale, se Covid-19 është kthyer në tragjedi për shqiptarët në sajë të papërgjegjshmërisë së atyre që drejtojnë.
Postimi i Dashos në Facebook
NJË TRAGJEDI NË ZHVILLIM TË PLOTË!
Kur numri i vdekjeve nga COVID ka arritur 15-20 çdo ditë, kjo do të thotë se:
- Numri i rasteve është diku midis 4 dhe 5 mijë në ditë. Në se kap vetëm 700-800, do të thotë se nuk teston!
- Çdo ditë kanë nevojë të shtrohen në spital rreth 200-250 persona. Në se nuk shtrohen, do të thotë se i ke lënë në shtëpi pa kujdes shëndetësor!
- Çdo ditë kanë nevojë për kujdes reanimator rreth 50-60 persona. Në se kjo nuk ndodh, tregon se nuk ke mjaftueshëm shtretër reanimatorë, pajisje dhe personel!
Me këto duhet të merret ministrja Manastirliu dhe jo të bëjë propagandë me 400 mijë testet e shpejta që duhej t’i kishte sjellë që në shtator!
Me këto duhet të merret kryeministri sepse edhe sikur takimet e veta “sy më sy” të bëjnë çudinë, deri sa të nisë vaksinimi, rrezikojnë që vetëm zyrtarisht të kenë vdekur disa qindra (për të mos thënë mijëra) shqiptarë!
15 humbje jete në ditë, do të thotë 450 humbje jete në muaj, ose 1,350 humbje jete të deklaruara zyrtarisht deri në fund të dimrit!!!
Mendo për humbjet e jetës që manipulohen dhe nuk raportohen!!!
Mendo për ata që humbin jetën në shtëpi!!!
COVID është kthyer në tragjedi për shqiptarët në sajë të papërgjegjshmërisë së atyre që na drejtojnë!
Koha është për veprim dhe jo për demagogji e manipulime!!!
