Teksa sot bëhen një javë pas vdekjes së Maradonës, pritet që të bëhen analizat e mostrave të urinës, gjakut dhe zemrës të marra gjatë autopsisë. Ky vendim është marrë pasi ka ende dyshime shumë të forta përsa i përket kujdesit dhe kurimit të legjendës së futbollit.
Autoritetet mjekësore në Argjentinë kanë arritur të zbulojnë se zemra e tij peshonte 2 herë më shumë se një zemër normale.
Mjekësia ligjore që kreu autopsinë në trupin e Diego Armando Maradona raportoi se ai kishte kardiomiopati të zgjeruar dhe peshonte rreth 500 gramë, dyfishin e sasisë normale.
Ky element pritet të vlerësohet sot në analizat që do të kryhen, së bashku me studimet e tjera toksikologjike, përmes së cilave do të përcaktohet nëse Maradona kishte konsumuar alkool, drogë, ose ndonjë substancë tjetër para se të ndërronte jetë. Këto analiza do të kryhen nën mbikëqyrjen e rreptë të Policisë Shkencore në qytetin e La Platës.
Legjenda Diego Armando Maradona mbylli sytë në moshën 60-vjeçare, pas një arresti kardiak. Maradona po merrte veten pas ndërhyrjes kirurgjikale që kreu në kokë, por shëndeti i tij është përkeqësuar. Ai pësoi arrest kardiak.
Maradona kishte personel mjekësor që e mbanin nën vëzhgim në shtëpinë e tij, por nuk ia doli ti mbijetonte arrestit kardiak. Maradona njihet edhe si El pibe de oro (djali i artë) dhe njihet nga shumica si futbollisti më i mirë i të gjitha kohërave.
Në vitin 1986, me skuadrën kombëtare të Argjentinës fitoi kupën e botës, dhe në vitin 1990 skuadra argjentinase ishte nënkampione botërore. Në vitin 1989, Maradona me Klubin futbollistik të Napolit fitoi Kupën e UEFA-s, dhe në vitet 1987 dhe 1990 u shpallën kampionë të Italisë. Ky largim i hidhur ka lënë në trishtim mijëra fansa në të gjithë botën.
