Kryetari i Bashkisë Kukës, Safet Gjici ka kërkuar ndjesë për heqjen e titullit ”Qytetar Nderi”, të publicistit dhe politikanit kosovar, Veton Surroi.
Gjici shprehet se kjo ishte një veprim i nxituar pas kërkesës së 57 familjeve të Dëshmorëve të UÇK-së.
”Në emër të Bashkisë Kukës kërkoj ndjesë për veprimin e nxituar sot në Këshillin e Qarkut, lidhur me vendimmarrjen për heqjen e Titullit “Qytetar Nderi” Veton Surroit, pas kërkesës së 57 familjeve të Dëshmorëve të UÇK-së! Duke u ndjerë shumë pranë atyre familjeve dhe dhimbjes së tyre në raport me këtë kohë lëndimesh për UÇK nuk e menduam më gjatë kërkesën e tyre emocionale. Safet Gjici, kryetar i Bashkisë Kukës.’’, shkruan Gjici në rrjetin social, Facebook.
Më herët gjatë ditës së sotme, Këshilli i Qarkut Kukës, vendosi që Surroit t’i hiqej titulli ”Qytetar Nderi”, për shkak të fushatës mediatike dhe politike që ai po bën kundra Ushtrisë Çlirimtare të Kosovës.
I menjëhershëm ishte reagimi i kryeministrit, Edi Rama i cili e cilësoi këtë vendim si lajthitje kolektive, dhe kërkoi nga prefekti i qarkut të mos e pranojë kërkesën e këshillit.
“Vendimi i Këshillit të Qarkut të Kukësit për heqjen e titullit “Qytetar Nderi” Veton Surroit është një lajthitje kolektive që uroj Prefekti do ta refuzojë! Ndërkohë parlamenti duhet të ndërhyjë për ta normuar njëherë e mirë çështjen e titujve e të medaljeve.
Ky vend s’mund të jetë një planet më vete brenda botës që e ka sistemuar me kohë e me vakt këtë punë, ku s’ka president që jep medalje për heronjtë e luftrave të shkuara se kështu i thotë koka dhe s’ka këshill që ia heq titullin dikujt me kërkesë të disave! Boll me këtë absurd!“, ka shkruar Rama në rrjetin social, Twitter.
Ky vend s’mund të jetë një planet më vete brenda botës që e ka sistemuar me kohë e me vakt këtë punë, ku s’ka president që jep medalje për heronjtë e luftrave të shkuara se kështu i thotë koka dhe s’ka këshill që ia heq titullin dikujt me kërkesë të disave! Boll me këtë absurd!
— Edi Rama (@ediramaal) November 27, 2020
