Prej disa javësh, Shqipëria është përballur me shifra të larta të të infektuarve. Nga ana tjetër, opozita shfaq me anë të video-ve pamje të rënda nga spitalet, duke vënë në dukje se pacientët presin me orë të tëra jashtë ambienteve, pasi nuk ka më kapacitete.
Kjo është përgënjeshtruar nga ana e kryeministrit Rama dhe Ministres së Shëndetësisë, Ogerta Manastirliu. Por ndryshe nga çfarë është përfolur se do të ketë një mbyllje të dytë, deputeti i PS-së, Anastas Angjeli, konfirmon se kjo nuk do të ndodhë.
Por nuk shmang ato që i konsideron kufizime të pjesshme. Shqipëria ka parapaguar 1.5 miliardë lekë për sigurimin e 1.4 milionë vaksinave.
Lajmi është bërë i ditur nga deputeti socialist në ‘A2’. “Ka dy ekspertiza, një është e Task Forcës për pandeminë dhe një tjetër është eksperienca e vendeve të tjera dhe ekspertiza brenda vendit, e cila nuk rekomandon një mbyllje të dytë.
Kufizime të pjesshme do të ketë, por mbyllje të dytë që të krijojë një kolaps ekonomik nuk mendohet se do të ketë, dhe aq më tepër edhe kushtet po e tregojnë atë.
Investimi në shëndetësi, si dhe prodhimi i vaksinave, të cilat do të fillojnë në fund të vitit të shpërndahen. Shqipëria ka paguar paradhënie dje, në afatin e fundit, shumën prej 1.5 miliardë lekësh, e barabartë me sigurimin e 1.4 milionë vaksinave”.
