Situata epidemiologjike e Covid-19 po përkeqësohet nga dita në ditë në vendin tonë, pasi shifrat janë rritur në mënyrë të ndjeshme.
Drejtori i Urgjencës Kombëtare, Skënder Brataj në një deklaratë për mediat, sqaroi situatën e krijuar tek spitali Infektiv, (Covid 1).
Kohët e fundit, ka patur fluks autoambulancash dhe pacientë brenda tyre që presin të shtrohen në spital.
Skënder Brataj: ”Procesi është dinamik dhe vlerësimi i përditshëm, ndaj edhe sot po kalojmë në masat e mesme, për shkak të rritjes së rasteve. Numrat dhe shifrat flasin për një rritje në muajin e fundit.
Kohët e fundit në media është vënë alarmi që ka shumë ambulanca dhe nuk ka shtretër. Është normale që të sëmurët të trajtohen edhe në ambulancë, pasi ambulancat janë si minispitale. Ka ndodhur që mbaron oksigjeni, por edhe ai zëvendësohet. Kjo ndodh që të vlerësohet.”
Për shkak të rritjes së rasteve me Covid-19, Komiteti Teknik i Ekspertëve mori këto vendime:
1. Kufizimi i lëvizjes nga ora 22:00 – 06:00 në të gjithë vendin, me përjashtim të lëvizjes për motive pune, emergjenca shëndetësore apo nevoja të domosdoshme.
2. Ndalohen aktivitetet e bareve – restoranteve nga ora 22:00 – 06:00 (përvec shërbimit delivery).
3. Smart-working për administratën publike (sipas specifikës së sektorit) në zbatim të protokolleve të sigurisë. Përjashtim bëjne strukurat ofruese të shërbimeve duke zbatuar protokollet e sigurisë.
Këto masa do të hyjnë në fuqi më 11 nëntor dhe do të zgjasin për 3 javë.
