Ministri i Shëndetësisë në Kosovë, Armend Zemaj ka paralajmëruar masa të reja për të parandaluar përhapjen e koronavirusit, por nuk ka dhënë detaje se për çfarë bëhet fjalë.
Ai është takuar me disa përfaqësues së disa grupeve të interesit në Kosovë.
Sipas tij, ndonëse shqetësimet e secilës kategori janë të arsyeshme, shëndeti publik gjendet në rend të parë.
“Secili nga ne ndjejmë përgjegjësinë për mbarëvajtjen e shëndetit publik dhe shëndetësisë, andaj është qenësore që të gjithë se bashku, nga aty ku veprojmë t’i zbatojmë rregullat për të parandaluar përhapjen e virusit sikurse dhe udhëzimet që dalin nga Manuali për Mbrojtje nga Përhapja e Covid1.
Janë të arsyeshme shqetësimet e secilës kategori të shoqërisë sonë, por të gjithë së bashku duhet të mendojmë për shëndetin publik. Rekomandimet e marra gjatë takimit të sotëm, do t’i diskutoj me kryeministrin z.Hoti në mënyrë që masat e marra nga Qeveria të prekin sa më pak ata dhe të jenë sa më të lehta për të gjithë ne”, shkruan Zemaj në rrjetin social, Facebook.
Në 24 orët e fundit në Kosovë janë regjistruar 730 raste të reja me koronavirus, ndërsa vetëm në Prishtinë 312. Ndërkohë, 11 persona humbën jetën si pasojë e COVID-19.
