Sikundër u njoftua një ditë më parë, shërbimet sekrete në Shqipëri kanë shtuar kontrollet pas sulmeve terroriste.
Gazetarja Klodiana Lala ka rrëfyer në emisionin “Opinion” në Tv Klan, se antiterrori ka kaluar nga gjendje jeshile në atë portokalli, dhe po vëzhgon më shumë se 30 persona të kthyer nga Siria.
Forca të shumta policie do të ketë në pikat kufitare dhe në institucioneve me rëndësi të lartë, siç janë ambasadat e huaja.
“Nuk ka pasur një njoftim zyrtar, por nga kontaktet me antiterrorin ka pasur një rritje të sigurisë. Që në orët e para të mëngjesit, Shqipëria ka nivel portokalli dhe ka patrullim të shtuar.
Do të ketë patrulla më shumë afër ambasadave dhe në pikat kufitare dhe në aeroport. Por ajo që bën çudi është se pak minuta më parë, Ministri i Brendshëm britanik ka lajmeruar qytetarët që të këtë kujdes për ndonjë sulm të mundshëm.
Ndërsa në Shqipëri nuk ka pasur kurrë një njoftim për këtë gjë, por në s’kemi qenë një vend i rriskuar. Antiterrori ka marrë sot të paktën 30 persona në vëzhgim që kanë ardhur nga Siria, të cilët nuk janë dënuar nga drejtësia shqiptare.
Unë sot kam pyetur nëse agresori i Vienës të kishte hyrë në territorin shqiptar, dhe nuk kishte hyrë kurrë në Shqipëri. Austria këtë herë ka qenë shumë e interesuar dhe ka shkëmbyer shumë informacione”, tha më tej ajo.
