Sot, Rama dhe Manastirliu kanë vizituar ambientet e spitalit të Covid 3 të ngritur në ambientet e rehabilituara të ish-Urgjencës në QSUT. Ministrja e Shëndetësisë, Ogerta Manastirliu, tha se kjo strukturë do të bëhet funksionale brenda kësaj jave. Spitali Covid 3 ka në dispozicion 150 shtretër për trajtimin e pacientëve me Covid-19. Sakaq, janë trajnuar mjekët dhe personeli infermieror. Bëhet fjalë për një staf prej 10 mjekësh infeksionistë.
“Këtë javë do bëhet funksionale kjo strukturë. Janë përgatitur mjekët dhe infermierët për të trajtuar pacientët, sipas një protokolli të përcaktuar. Këto janë strukturat e ish-kirurgjive. Ne kemi bërë edhe një rehabilitim për të plotësuar kapacitetet e shtruara. Janë 150 shtretër në këtë strukturë. Ka edhe një njësi të reanimacionit.
Në strukturën e re të Covid 3, është përfunduar si strukturë në aspektin fizik. Është instaluar oksigjeni në çdo shtrat dhe pajisja me respiratorë. Janë trajnuar mjekët dhe personeli infermieror. Ai është rekrutuar me dëshirën e tyre. Është një staf prej 10 mjekësh infeksionistë. Kemi mjekët infeksionistë të trajnuar prej kohësh”, tha Manastirliu.
