Deputeti Damian Gjiknuri ka folur pas mbledhjes së sotme të Këshillit Politik, duke u ndalur te aspektet negative që mbart implementimi 100% i listave të hapura.
I ftuar në emisionin “Top Talk”, Gjiknuri tha se kjo mënyrë zgjedhjeje do t’i hapte rrugë kriminelëve dhe njerëzve të padenjë që të futen në parlament. Ai pohoi se ky modul do të prodhojë zgjedhje të korruptuara, prandaj sipas tij zgjidhja që ka propozuar PS është më stabël dhe mënjanon raste të tilla.
“Unë me të vërtetë kam pasur kritika për këtë dhe nga se jam nisur, deri diku edhe si njohës i politikës shqiptare sepse kam vite që militoj dhe e njoh terrenin politik shqiptar. Nuk jam nga njerëzit që nuk jam mësuar me fushata dhe nuk marr vota dhe e dyta kam parë çfarë ka ndodhur në vendet e tjera, sidomos në vendet që nuk kanë maturimin demokratik, kjo ka qenë realiteti. Cilësia jo vetëm që nuk është rritur, por në disa vende që janë të ngjashme me Shqipërinë janë zgjedhur dhe nivelet më të dobëta të mundshme, pse? Sepse është ky elementi tribalizmat, zgjidhen tipat ë fortë, kush ka para, këto ndodhin”, tha ai.
