Kryeministri Edi Rama ka bërë publike të gjitha takimet dhe telefonatat që ka zhvilluar me kryeministrin grek, Kyriakos Mitsotakis.
I ftuar në emisionin “Opinion”, Rama tha se në asnjë nga këto takime apo telefonata nuk është folur për çështjen e detit. Sipas tij, negociatat me fqinjët janë ngrirë që pas ndërrimit të qeverive.
“Unë me Mitsotakis kam folur kur ra tërmeti, më ka marrë në telefon dhe ka thënë se çfarë duhet të bëj unë, dhe kur kemi nisur fazën e dytë të hapjes së karantinës. Jam takuar në OKB dhe në një takim tjetër në Athinë kur nuk kemi folur asnjë sekond për këtë çështje, kemi qenë në prani të delegacioneve. Kemi folur për nismën për të sheshuar mosmarrëveshjet e mëparshme”, tha ai.
Kreu i qeverisë nuk i kurseu akuzat ndaj liderëve të opozitës dhe presidentit Ilir Meta për marrëveshjen e vitit 2009 me Greqinë. Rama theksoi se në dialog me palën greke janë diskutuar të gjitha pikat përfshirë këtu edhe detin.
“Shportat për të cilat flet ambasadori janë blloqe të një dialogu me Greqinë ku ata i kanë shtruar të gjitha temat dhe ne i kemi shtruar të gjitha temat. Marrëveshja quhet e tillë kur ekziston dhe që të ekzistojë duhet të ketë firma dhe vula, por duhet të kalojë në disa etapa.
Por edhe nëse i kalon këto etapa nuk është marrëveshje nëse nuk shkon te Kuvendi dhe më pas të presidentin. Presidenti ka thënë se do ta çojë marrëveshjen në Gjykatën Kushtetuese. Por duke qenë se mjedisi shqiptar ushqen veten me thashetheme kemi arritur në absurdin që një vend i tërë po beson një thashethem. Parimi për të cilin ka folur Mitsotakis nuk përputhet me Shqipërinë. Ai ka folur për një të drejtë sovrane.
Më pas këtu plasur peshku sa të duket vetja sikur jeton në foltoren e Ollgës. Meta është në grupin e peshkatarëve. Meta, Berisha, Basha e kapin peshkun, Monika e skuq me desperado. Ata tjerët janë autorët e një marrëveshje me firma dhe vula”, tha ai.
