Ish-kryetarja e Kuvendit, Jozefina Topalli, nuk i ndahet emrit të kryetarit të PD-së për të lënë postin. Në një intervistë për “Report Tv”, në lidhje me zgjedhjet parlamentare që do të zhvillohen me 25 prill, Topalli ka thënë se Basha duhet të largohet nga drejtimi i PD para zgjedhjeve.
Sipas saj, në PD duhet një lider i pa korruptuar që sjell besim. Topalli nuk është ndalur me kaq, por tha se pasuria e Bashës është e paqartë, ku vetëm shton vilat.
“Pasuria e Bashës është shumë e paqartë, ai një vit para zgjedhjeve shton vilat. Basha duhet të bëjë transparencë për pasurinë e tij. Nëse ai nuk ikën nga drejtimi i PD-së, Rama merr mandatin e tretë”, tha Topalli.
Ndërsa përsa i përket koalicionit me LSI-në, Topalli tha se pa pushtet moral nuk vinë votat.
Ajo u është përgjigjur edhe spekulimeve për “lista Topalli” në zgjedhjet 2021. Topalli u shpreh se nuk do të ketë një listë të tillë, pasi nuk po lufton për karrigen e deputetit.
Kujtojmë këtu se Rama mblodhi sot drejtuesit politikë të qarqeve në Shqipëri. Në një komunikim me gazetarët jashtë selisë rozë, kreu i grupit parlamentar socialist, Taulant Balla, tha se ky lloj takimi do të vijojë deri ditën e zgjedhjeve, që do të zhvillohen më datë 25 prill të vitit të ardhshëm.
