Franca dhe Greqia kanë rënë dakord për shitjen e 18 gjuajtësve ‘Rafale’ me dy motorë për forcat ajrore greke. Kjo marrëveshje ka ardhur me qëllim për përforcimin e pozitave të Greqisë, në konfrontimet me Turqinë për Mesdheun Lindor.
Një deklaratë e fortë ka ardhur nga zëdhënësi i partisë qeverisëse Partia për Drejtësi dhe Zhvillim (AK Parti), Omer Çelik. Sipas tij, Greqia është një shtet mashtrues në Mesdheun Lindor, duke tejkaluar dhe kapërcyer vijën. Sipas tij, Turqia nuk do ri në heshtje.
“Turqia nuk do të pranojë e as nuk do të falë asnjë veprim ose blof kundër politikës së saj “Atdheu i Kaltër” në territorin e saj detar, tha Çelik para mediave, pas një takimi të bordit të partisë.
Në lidhje me veprimet e Francës në rajon, e cila ka mbështetur përpjekjet greke për të kufizuar Turqinë në brigjet e saj, ai tha se Franca nuk fiton asgjë duke sjellë mjete luftarake në Mesdheun Lindor ose duke mbajtur stërvitje me administratën e Qipros Greke. Omer Çelik shtoi se Turqia do të përgjigjet pas tentativës së presidentit francez.
“Nëse presidenti francez Emmanuel Macron përpiqet të tërheqë një vijë të kuqe në “Atdheun e Kaltër” të Turqisë, Turqia do të përgjigjet”, përfundoi ai.
