Konstitucionalisti Shkëlqim Hajdari, ka folur lidhur me çështjen e kufirit detar mes Shqipërisë dhe Greqisë, ku kjo e fundit po tenton të zgjerohet me 12 milje. Një ditë pas dorëzimit në parlamentin grek të projektligjit për zgjerimin e ujërave territorialë të Greqisë, 12 milje në Perëndim të Detit Jon, Shkëlqim Hajdari i cili është njohës i mirë i kësaj çështje, jep argumentet e tij se çfarë po ndodh.
“Greqia është në një marrëdhënie të vështirë me Turqinë, sepse Greqia kërkon të mbyllë ndarjet territoriale me shtetet kufitare. Tani kërkon ta mbyllë me Shqipërinë e Turqinë. Mendoj se lëvizja është diversion. Kërkesa e Greqisë për të vijuar diskutimet me palën shqiptare, e vendos në kontekstin e diskutimit me Turqinë. Duhet të kemi kujdes, por jo frikë!
Unë e shoh këtë në kuadër të situatës që është krijuar me Turqinë. Ne duhet të jemi të qetë. Nëse Greqia nuk është e vendosur që marrëdhëniet me Shqipërinë t’i fusë në një kontekst fqinjësie, do të përfundojmë në Gjykatën Ndërkombëtare me këtë histori. Nëse Greqia do të marrë për bazë që kufiri është ishulli i Korfuzit, ne jemi në rregull. Gjithë konventat ndërkombëtare aty e ndajnë gjysmë për gjysmë. Nëse do marrë pikë fundore ishullin e Othonoit, jemi të bindur se nuk do të merremi vesh. Ka gjithë të drejtën të marrë Korfuzin dhe kështu ngjarjet me Greqinë zgjidhen menjëherë. Greqia ka ishuj sa të duash, ka territor detar pafund. Nuk ma merr mendja kurrë që të marrin si pikë referimi ishullin e Othonoit”.
Kryeministri i Greqisë, Kyriakos Mitsotakis, gjatë fjalës së tij në Parlament zbuloi se ministri i Jashtëm Nikos Dendias, do të vijë shumë shpejt në Tiranë, për të folur lidhur me marrëveshjen për detin Jon. I pyetur se pse po ndodh kjo lëvizje, Hajdari tha: “Nëqoftëse ministri i Jashtëm vjen në Shqipëri për të diskutuar që Greqia me Shqipërinë duhet të marrin 12 milje dhe do i referohet një guri që një herë e mbulojnë dallgët dhe një herë e zbulojnë, kjo nuk është një klimë që mund të diskutohet në shtetin tonë”.
Në kohën kur Athina është në prag lufte me Turqinë, duket se po përdor një strategji tjetër duke tentuar të fusë në lojë edhe Shqipërinë. Parlamenti grek diskutoi paktin me Italinë, ndërkohë që nuk mbeti pa u përmendur dhe Shqipëria. Kryeministri grek, duke folur në Parlament, u shpreh i bindur se Greqia do të zgjerojë kufirin e saj detar me 12 milje në kurriz të Shqipërisë, duke shtuar akoma dhe më tej provokimet. I pyetur nëse mund të negociohet, z. Hajdari i mëshoi faktit se marrëveshjet e këtij lloji janë delikate.
“Marrëveshjet të këtij lloji janë delikate, kjo historia… Shoh që segmente të politikës duan ta politizojnë. Çështje me sovranitet torritorial nuk duhet të politizohen. Ky është një det që do jetë në dispozicion të 10 miljon shqiptarëve. Përfaqësuesi i Ministrisë së Jashtme ka bërë një sqarim konkret. Pavarësisht klimës shumë të fortë mes Greqisë dhe Turqisë, këtu ti ndajmë detet, jo kush është më i fortë”.
Mund të shkohet në ndarjen e detit? “Ne kemi në dorë që pala shqiptare, e ka të qartë se ku shkojnë çështjet e ligjshme. Nuk është vetëm një njeri që i di”.
Një ditë më parë, duke replikuar me komentuesit në rrjetet sociale, të cilët e akuzojnë për shitje të detit, Rama ka deklaruar se nuk do të përsëritet tradhtia e Berishës në 2009. Z. Hajdari tha se reagimet e Ramës, janë të kujdesshme.
“Kryeministri ka dhënë një mesazh, që nuk është akoma zyrtar. Siç duket, kryeministri mendon se i shërben klimës se bashkëpunimit të Ministrisë të Jashtme. Shpreson se me palën greke të ketë një marëdhënie reciproke. Por ne kemi një praktikë ndërkombëtarë, shtetet kanë ndarë territoret detare. Shpresoj, besoj, që duam marrëdhënie fqinjësie të mirë që mos të përfundojmë në Gjykatë Ndërkombëtare. Nëse do shkojmë, e drejta ka për të qenë me të drejtën shqiptare”.
Pse kërkojnë ta zgjerojnë? “Çdo vend, këto ndarje janë të përjetshme. Historia e jonë me Greqinë është e qartë, vetem se duhet që pala shqiptare të jetë e përgatitur, është e përgatitur! Me Italinë s’kemi probleme. Me Greqinë është specifike, bisedimet do zgjasin. Nuk do jenë të lehta, e kam konsultuar me njerëz të së drejtës ndërkombëtare. Shqipëria nga kjo lëvizje politike përfiton, se ne do të vazhdojmë negociatat”.
Pozicioni i Turqisë? “Turqia është në një marrëdhënie delikate me Greqinë. Deklarata e Erdogan, janë të forta dhe serioze. Pretendon se duhet ndarë kufiri me Greqinë. Situata, shpresojmë qe të mos përshkallëzohet dhe të triumfojë dialogu. Aty janë edhe interesa ekonomike, sepse ne ato territore ka dalë gaz. Ne nuk kemi nxitim, deti është aty. Pala shqiptare i ka gjërat e qarta, kjo është vizita e parë. Pala greke do arsyetojë se marrëveshja e 2009 ishte e drejtë”.
A do kete transparencë? “Nuk e di çfarë do bisedojnë në tavolina, pa u firmosur do e marr vesh çdo shqiptar. Politika dhe grupi i negociatorëve e dinë sa e ndjeshme është kjo çështje. Në mometin kur do ketë një draft, para se te shkojnë në Parlament, çdo shqiptar do marr vesh se ku po shkohet, elementët e transparencës …para se të shkojë për firmë do e marr vesh çdo shqiptar”.
TIRANA TODAY
