Shefja e epidemiologjisë në ISHP, Silva Bino, është shprehur se koronavirusi vijon të jetë po aq i rrezikshëm sa në fillim.
Në një intervistë për News24, Bino tha se vazhdon të ketë një qarkullim të dendur të virusit, kryesisht në qytetet e mëdha si Tiranë dhe Durrësi.
Ajo shtoi se së fundmi po rrezikohen edhe moshat e reja 25-40 vjeç, ku preken më shumë gratë. Sipas saj, po bëhet plani për sigurimin e 400 mijë vaksinave të gripit, që do iu bëhen grupeve të riskut, duke filluar nga muaji shtator.
“Ka plane dhe janë siguruar gati 400 mijë doza vaksine, të cilat do të vijnë nga shtatori deri në fund të tetorit e fillimin e nëntorit. Ky është një 4-fishim i dozave të vaksinës, që mbulon grupet e riskut, si dhe fëmijët, gratë shtatzëna, mësuesit, që do të shërbejnë në shkollat fillore e 9-vjecare, edukatorët, si dhe personeli mjekësor. Popullata do fillojë të vaksinohet që nga shtatori e muajt në vijim. Do jetë vaksinim falas i popullatës? Ky është një vaksinim falas, por natyrisht do të ofrohet edhe vaksinim në shërbimin privat.
Moshat më të prekura janë ato mbi 25 vjeç deri në 40 vjeç dhe pastaj kemi moshën mbi 50 vjeç. Përqindja më e madhe te moshat e reja janë femra, ndërsa në moshën mbi 60 vjeç janë meshkuj. Kjo për faktin se ne kemi pasur shumë shpërthime në fabrika e fasoneri, ku punojnë më shumë gratë, ndaj dhe ato mbajnë ‘barrën’ e virusit. Si shpjegohet që në një organizëm virusi është shumë agresiv dhe në një tjetër vepron më lehtë? Për këtë virus dihet shumë pak. Ka shumë arsye për këtë. Te disa organizma kemi dëmtim të madh të mushkërisë. Kjo do të sqarohet me kalimin e kohës. Por dihet që kjo lidhet me strukturën imunitare të personave të caktuar. Struktura e virusit është e tillë që nuk lejon të pësohen mutacione, sit e gripi. Kur ndodhin mutacione, virusi zbutet”, tha ajo.
