Kryeministri i Kosovës, Avdullah Hoti, ka zhvilluar sot një bisedë telefonike me sekretarin e Përgjithshëm të NATO-s, Jens Stoltenberg.
Gjatë bisedës, Hoti vlerësoi punën e Ekipit Këshillues dhe Ndërlidhës të NATO-s (NALT), që po jep një ndihmë të rëndësishme për avancimin e institucioneve të sigurisë së Kosovës.
Hoti theksoi se Republika e Kosovës është e përkushtuar ta ndërtojë të ardhmen e saj euroatlantike dhe të bëhet sa më parë pjesë e NATO-s dhe e institucioneve të tjera ndërkombëtare.
Nga ana tjetër, sekretari Stoltenberg e siguroi kryeministrin Hoti se NATO do të vazhdojë të bashkëpunojë ngushtë me institucionet e Kosovës, për të siguruar një mjedis paqësor dhe një të ardhme të sigurt për qytetarët e saj dhe të rajonit, si dhe mbështetjen për procesin e dialogut me Serbinë si mënyrë e vetme për të siguruar zgjidhje politike afatgjatë.
