Avokati i Emiljano Shullazit, Vladimir Meçi nuk është lejuar të takojë klientin e tij që tashmë është izoluar në regjimin e posaçëm “41 Bis”.
Sipas Meçit, kjo është një shkelje ligjore, ndërsa shprehet se për administratën e burgut “313” do të paraqesë një kallëzim penal:
“Ne shkuam të takojmë klientët tanë që tashmë janë futur në regjimin e posaçëm. Edhe për të nënshkruar ankimet kundër Ministres së Drejtësisë.
Nuk u lejuam nga administrata e burgut që të futemi brenda. Nuk u dha asnjë shpjegim.
Mesa duket arbitrariteti dhe paligjshmëria vazhdon në këtë drejtim, duke penguar avokatët.
Në një kohë që ligji parashikon kufizime për takimet e personave të paraburgosur në regjimin e posaçëm me persona të tjerë, por përjashton avokatët ndaj çdo lloj kufizimi. Ky është një veprim haptazi i kundraligjshëm. Për këto veprime, ne do të paraqesim kallëzim penal”.
Shullazi pritet të qëndrojë për një vit në këto qeli, duke pasur edhe reduktim të takimeve me të afërmit, reduktim të telefonatave si dhe vëzhgim 24 orë me kamera sigurie.
Izolimi i tij u bë të shtunën e kaluar me urdhër të Ministres së Drejtësisë, Etilda Gjonaj, e me propozim të SPAK.
