Pas 11 vitesh pritjeje, klubi i Tiranës do të ngrejë sot më në fund titullin kampion. Por, kjo fitore nuk do jetë e plotë pa tifozët, të cilët nuk do të lejohen të jenë të pranishëm për shkak të situatës nga pandemia.
Skuadra bardheblu është munduar ta ngrohë disi atmosferën me një koreografi speciale në “Air Albania” me ngjyrat bardheblu, ku shkruhet KAMPION.
Sipas Panorama Sport, rreth 400 forca policie ndodhen në perimetrin e stadiumit, për të shmangur turmat e tifozëve, në rast se këta të fundit tentojnë që t’i bashkohen festës së titullit.
Ndërkohë, nuk kanë munguar as kontrollet me qen anti-ekskpolziv nga policia brenda stadiumit.
Në këtë 100 vjetor, Tirana vjen me një këngë të re festive. Gjithashtu, në stadium ndodhet edhe këngëtari i himnit të të gjithë tifozëve autokton tiranas, Pajtim Struga.
