I dërguar i posaçëm i SHBA për dialogun Kosovë-Serbi, Richard Grenell, ka folur lidhur me iniciativën e fundit të BE-së për rikthimin e dy vendeve në tryezën e dialogut.
Në një prononcim për Gazetën Express, Grenell thotë se nisma e Evropës ka mbështetjen e plotë të SHBA-së. Ai shprehet se është i lumtur që evropianët po organizojnë videosamitin e Parisit më 10 korrik dhe takimin mes Kosovës dhe Serbisë më 12 korrik në Bruksel.
Grenell tha se pret që në këto dy takime të përmbyllet edhe procesi i liberalizimit të vizave për kosovarët.
“Ne jemi të kënaqur t’i shohim evropianë tek organizojnë takime më 10 dhe 12 korrik për diskutime të mëtejme mes Kosovës dhe Serbisë. Ne ofrojmë mbështetjen tonë të plotë dhe jemi mirënjohës për lidershipin e tyre. Ne shpresojmë që çështja e rëndësishme e liberalizimit për Kosovën do të kompletohet në këtë takim.
Shtetet e Bashkuara të Amerikës kanë punuar fortë për të theksuar normalizimin ekonomik të raporteve në mes të palëve, sepse ne besojmë se është hapi i parë e krucial për këtë mosmarrëveshje afatgjatë. Dhe ne shpresojmë që evropianët ta bëjnë prioritet kryesor implementimin e marrëveshjeve për transportin ajror, hekurudhor dhe rrugor, të arritura më parë. Ne besojmë se këto marrëveshje janë çelësi për krijimin e vendeve të punës dhe për dhënien e shpresës tek popullata e re e rajonit”, tha ai.
