Më 9 korrik, në Prishtinë do të organizohet një protestë kundër aktakuzës së publikuar ndaj presidentit të Kosovës Hashim Thaçit, kreut të PDK-së Kadri Veselit dhe 9 luftëtarëve të tjerë.
Në njoftim thuhet se ngritja e kësaj aktakuze, është bërë me qëllim të caktuar, e sidomos për ta penguar procesin e dialogut Kosovë-Serbi.
Ndaj në datën 9 korrik është kërkuar një protestë mbarëpopullore, me moton: “Në mbrojtje të Luftës Çlirimtare”.
“Në mënyrë unanime edhe një herë u tha se jemi kundër gjykatës së tillë speciale me seli në Hagë. U konstatua se bërja publike e ngritjes së aktakuzës së pakonfirmuar dhe momenti në të cilin u bë, tregon qartë atë që është thënë vazhdimisht se kjo gjykatë e sidomos Prokuroria në Hagë është e ndikuar politikisht, gjë që e bën të kundërligjshëm gjithë procesin.
Ngritja e kësaj aktakuze është bërë me qëllim të caktuar, e sidomos për ta penguar procesin e dialogut Kosovë-Serbi. Të kërkohet nga Kuvendi i Kosovës që ta ndryshojë Ligjin për Gjykatën Speciale, për arsye se duhet të gjykohen të gjitha krimet dhe gjenocidi i kryer nga Serbia në Kosovë dhe të mbahet protestë gjithëpopullore në Prishtinë më datën 9 korrik 2020, me moton: ‘Në mbrojtje të Luftës Çlirimtare’”, thuhet në komunikatën e OVL-së së UÇK-së.
Pak ditë më parë, presidenti i Kosovës, Hashim Thaçi, komentoi aktakuzën e ngritur nga Prokurori i Specializuar në Prokurinë e Gjykatës së Hagës, për krime Lufte së bashku me kreun e PDK-së, Kadri Veselin.
Ai tha se nëse kjo aktakuzë do të konfirmohet, nga kjo drejtësi që ai e quan me dy standarte, do të dorëhiqet si president i vendit, edhe pse është i bindur në pafajësinë e tij. “Gabime politike mund të kem bërë, po jo krime lufte”, tha ndër të tjera Thaçi në fjalimin e tij.
