Ndonëse Ministria e Shëndetësisë pretendon se tregohet korrekte në përditësimin e të dhënave në lidhje me numrin e të prekurve e po kështu atyre që humbin betejën me COVID-19, një detaj kontradiktor e vë në pikëpyetje transparencën e këtij institucioni. Gjatë 24 orëve të fundit kanë qarkulluar informacione mjaft kontradiktore sa i takon humbjes së jetës së një mjeku. Për mjekun Arjan Pushi ka patur përplasje mes të dhënave të publikuara nga media, nga Ministria e Shëndetësisë dhe nga vetë kolegët e të ndjerit.
Një ditë më parë, mediat përcollën lajmin për ndarjen nga jeta të doktorit. Ky lajm konfirmohej nga nga kolegu i tij, mjeku Bernard Progni. Duke cituar mjekun, ky lajm u mohua nga Ministria e Shëndetësisë.
Ishte Ministrja e Shëndetësisë e cila sqaroi mbërmjen e djeshme, se si qëndronte e vërteta. E ftuar në emisionin “Open” në Top Channel mbrëmjen e së hënës, ministrja Manastirliu fajësoi mediat, duke i akuzuar për lajme të rreme.
“Është një informacion i rremë. Na ka ardhur shumë keq. Kemi apeluar për mediat për tu referuar burimeve zyrtare. Të kujdesen që informacionet të dalin nga burimet zyrtare për personat konkret. Është Ministria e Shëndetësisë që jep informacione. Ne kemi ruajtur transparencën me përgjegjësi”, u shpreh Manastirliu.
Si për ironi të fatit, pa ka kaluar 24 orë, Ministria e Shëndetësisë njoftoi zyrtarisht ndarjen nga jeta të mjekut që ishte infektuar me koronavirus.
“Ministria e Shëndetësisë njofton me hidhërim të thellë ndarjen nga jeta të profesorit të Fakultetit të Mjekësisë, Arjan Pushi, i cili, referuar shërbimit infektiv, ndërroi jetë pak momente më parë në Spitalin Infektiv, i prekur nga COVID-19, pavarësisht përpjekjes maksimale të stafit mjekësor. Prof. Arjan Pushi ka patur një karrierë të spikatur në fushën e hematologjisë dhe ka përgatitur shumë breza studentësh të Mjekësisë. Ministria e Shëndetësisë i shpreh ngushëllime famljarëve, dhe miqve të profesor Arjan Pushit”.
