Zbardhen ndryshimet përfundimtare në Kodin Zgjedhor, të arritura nga palët në Këshillin Politik. Në draftin e Kodit Zgjedhor bëhet e ditur që KQZ nuk do të pranojë listat me partitë që nuk kanë në përbërje të tyre së paku 30% femra. Gjithashtu në draft thuhet se qeveria nuk mund të marrë dot vendime 4 muaj para zgjedhjeve.
Në Kodin e ri Zgjedhor, parashikohet që zgjedhjet të zhvillohen në të gjithë vendin në periudhat 15 prill-15 maj ose 14 tetor-15 nëntor. Nëse data caktohet mes periudhës 15 prill dhe 15 maj, qendrat e votimit do të hapen në orën 07:00 dhe do të mbyllen në orën 09:00. Kur zgjedhjet caktohen në periudhën 15 tetor-15 nëntor, qendrat e votimit do të hapen nga ora 07:00 deri në 18:00.
Komisioni Qendror i Zgjedhjeve është institucioni që ka përgjegjësinë për organizimin, administrimin e zgjedhjeve, i cili monitoron veprimtarinë e administratës zgjedhore, monitoron veprimtarinë e subjekteve zgjedhore, organeve dhe institucioneve shtetërore, monitoron rolin e medias si dhe zgjidh ankesat apo kërkesat e lidhura me procesin zgjedhor.
Organet e KQZ janë; Komisioneri Shtetëror i Zgjedhjeve, Komisioni Rregullator dhe Komisioni i Ankimimeve dhe Sanksioneve (KAS).
Komisioneri do të zgjidhet nga Kuvendi dhe do të ketë mandat 7 vjeçar, i cili mund të përsëritet. Partia Socialiste zgjedh 4 kandidatë, ndërsa përfaqësuesi i opozitës politike përjashton 2 dhe Kuvendi zgjedh 1 nga 2 të mbeturit.
Përzgjedhja e kandidateve bëhet në një komision parlamentar, ku opozita jashtëparlamentare do të ketë një përfaqësues të vetin me të drejtë vetoje. Ky përfaqësues zgjedh gjithashtu 2 nga 5 anëtarët të Rregullatorit dhe 2 nga 5 anëtarët e Komisionit të Apelimit e Sanksioneve, ndërsa shumica zgjedh 3.
Ndërkohë përsa i përket listave të partive, KQZ ka të drejtën t’i refuzojë nëse nuk kanë 30% femra. Gjithashtu 4 muaj para zgjedhjeve, qeveria nuk mund të marrë vendim favorizuese si ulje taksash apo rritje pensionesh.
Zgjedhjet për herë të parë do të bëhen me identifikim biometrik, kurse përsa i përket financimit, do të jetë miks, nga buxheti i shtetit dhe nga donatorë. Administrata Zgjedhore ndërkohë do të jetë e pandryshuar edhe dy palë zgjedhje të tjera.
