Shefja e Departamentit të Sëmundjeve Infektive në ISHP, Silva Bino komentoi së fundmi rritjen e numrit të të shtruarve në Spitalin Infektiv.
Bino theksoi se duhet të përgatitemi për më të keqen:
“Virulenca e virusit nuk ka rënë, format klinike të sëmundjes mbeten të rënda. Vjeshta apo dimri do të na përballë me dy sëmundje, me koronavirusin dhe gripin. Kombinimi i këtyre dy sëmundjeve që kanë shenja klinike të ngjashme do të shtojë numrat, por edhe kërkesën për shërbime mjekësore.
Do të shihet nëse këto dy viruse do të jenë në garë me njëri-tjetrin apo dikush t’i zërë vendin tjetrit. Mbetet për t’u parë. Ne duhet të përgatitemi për më të keqen”.
Ndër të tjera, ajo i mëshoi faktit se vaksina është akoma në fazat e para në vende të ndryshme të botës.
“Kemi një numër të lartë rastesh, kemi një numër të lartë shtrimesh, kemi një numër të lartë vdekjesh.
Këtu nuk ka asgjë për të sajuar. Vaksina është akoma në fazat e para në vende të ndryshme të botës. Vaksinat kanë qenë element i rëndësishëm për ecurinë e njerëzimit dhe shëndetin e tyre”, u shpreh Bino në studion e “ABC News”.
