Mjeku i njohur infeksionist Pëllumb Pipero, në një intervistë në ‘ABC News’ ku foli për situatën e rënduar të infeksionit nga koronavirusi në vend, tha se çdo qytetar duhet të jetë i kujdesshëm në ambientin ku ekspozohet.
Ai sqaroi se personat që qëndrojnë më gjatë në një ambient të infektuar, sëmuren më rëndë nga koronavirusi. Ndaj edhe përdorimi i maskës në ambiente publikë është i domosdoshëm. Po kështu, Pipero tha se mosha e pacientit ndikon tej mase ndaj COVID-19, po kështu nëse kanë sëmundje bashkëshoqëruese.
“Ky virus, ndryshe nga të tjerët, varet shumë rëndesa e sëmundjes, nga koha e ekspozimit ndaj virusit. Sa më shumë të ekspozohesh në një ambient të infektuar, aq më rëndë sëmuresh. Koha e ekspozimit ndaj virusit është shumë e rëndësishme, mosha është shumë e rëndësishme, të sëmurët kronikë janë shumë të rëndësishëm. Mund t’ju them që kjo pandemi na ka dhënë mësime që do të mbeten në histori”, tha mjeku.
