Detaje të reja janë zbardhur në lidhje me ekzekutimin e Hekuran Billës, ngjarje e ndodhur pak ditë më parë në zonën e Komunës së Parisit. “Abc News” ka siguruar foton e Sebastian Malit, nipi i Prel Markut i prangosur sot si bashkëpunëtor në ekzekutimin e Billës.
Ai u arrestua në një lokal në zonën e ish-Parkut të Autobuzëve, ndërkohë që nuk ka pranuar të ketë lidhje me ngjarjen përpara grupit hetimor.
Lidhur me këtë attentat të tipit mafioz, pista kryesore në të cilën ka hetuar policia lidhet me hasmërinë. Në vitin 2006, Billa kishte vrarë në Londër Prel Markun, asokohe 22-vjeç, ndërsa në kërkim si autor i dyshuar për këtë ngjarje është pikërisht vëllai i këtij të fundit Viktor Marku.
Historiku
Pas daljes nga burgu në prill të vitit 2019, Billa ka harruar zotimin se do të punonte “korrier” në studion ligjore “Duka”. Ai ka vendosur që të udhëtojë jashtë vendit, në disa shtete të ndryshme.
Sipas TIMS, Billa ka lëvizur rregullisht drejt Greqisë, Belgjikës, Italisë dhe Holandës. Por destinacionet e tij më të preferuara ishin Holanda dhe Belgjika, madje nga vendi i fiundit sapo ishte kthyer, para se të ekzekutohej në Tiranë.
Edhe pse ishte dënuar me burg përjetë, Billa ka shkelur edhe në tokën britanike. Ai ishte nisur nga Belgjika për në Angli dhe më pas është futur në Shqipëri nga pika kufitare e Malit të Zi më 6 qershor me makinën e tij, në të cilën u gjet i vrarë.
Pas kthimit nga Belgjika, sipas familjarëve Billa ishte shfaqur i shqetësuar. I ndjeri, sipas familjarëve ka qenë i shqetësuar javët e fundit, duke i deklaruar të motrës: “Punët nuk i kemi hiç mirë”.
