Kryeministri i Kosovës Avdullah Hoti e prezantoi veten si udhëheqës i delegacionit të vendit në dialogun me Serbinë.
Kreu i qeverisë prezantoi platformën dhe objektivat në bisedimet për normalizim të marrëdhënieve mes Prishtinës dhe Beogradit përpara shoqërisë civile.
Hoti siguroi se nuk do të ketë negociata për territorin, por vetëm për njohje reciproke.
“Të gjitha konspiracionet e ndryshme për harta e shkëmbime territoresh për mua janë jo relevante, nuk janë të vërteta, nuk e di a kanë ndodhur apo nuk kanë ndodhur, por nuk merren parasysh dhe nuk janë pjesë e diskutimeve që do të kem unë bashkë me ekipin tim në këtë proces”, tha Hoti.
Sakaq, kryeministri ftoi partitë politike të vendit në një takim të enjten për të diskutuar lidhur me dialogun me Serbinë.
Mirëpo Lëvizja Vetëvendosje refuzoi këtë ftesë të kryeministrit duke e konsideruar si të panevojshme, pasi pretendon se kjo qeveri nuk ka legjitimitet dhe as kredibilitet.
