Ditën e sotme u raportua për 42 raste të reja me koronavirus në Shqipëri, ndërkohë së fundmi ka reaguar lidhur me këtë zhvillim mjeku infeksionist Pëllumb Pipero.
Ky i fundit tregon arsyet se përse është rritur kaq shumë numri i rasteve pozitive me COVID-19.
“Në radhë të parë është heqja e të gjitha masave kufizuese 10-15 ditë më përpara, së dyti është hapja e shumë aktiviteteve ekonomike, baret, restorantet, një ndikim kanë pasur edhe tubimet dhe protestat e ndryshme.
Po ashtu, një arsye tjetër që e besoj fort është shtimi i numrit të testimeve përmes gjurmimit. Ka rënë transmetueshmëria dhe virulenca, por virusi vazhdon të qarkullojë.
Koha e gjatë e ekspozimit bën të kemi raste të tjera pozitive dhe të sëmurë. Ndaj, duhet të kemi shumë kujdes. Pas 3 ditësh, situata besoj do të përmirësohet.
Të respektojmë në maksimum distancën fizike dhe vendosjen e maskave në ambiente publike krahas higjienës së duarve.
Kaq mjafton që edhe nëse ekspozohemi ndaj virusit, të mos sëmuremi, por të fitojmë imunitet”, u shpreh mjeku i njohur për “A2”.
