Një 25-vjeçar shqiptar është arrestuar në Greqi, pasi është kapur nga policia duke shitur lëndë narkotike.
Policia greke e sektorit special antikriminal, antiterrorit OPKE, kishte të dhëna se shqiptari ishte trafikant i sasive të mëdha të drogës. Raportohet se ai përdorte qendra tregtare të njohura për të kryer shitjet, ku qarkullonte me qeska të zeza mbeturinash.
Operacioni për arrestimin e tij është zhvilluar më datë 3 qershor. Forcat policore ndoqën me kujdes lëvizjet e 25-vjeçarit shqiptar me qeskën e zezë plot canabis dhe sapo hyri në dyqan, e kapën në flagrancë, pa i dhënë mundësinë të reagojë.
Sipas të dhënave, i riu shqiptar ishte tregtar me shumicë i lëndëve narkotike, të cilat i vendoste në pika të ndryshme të Athinës për bashkëpunëtorët, që në vijim i shisnin në sasi të vogla në tregun grek.
Pas arrestimit atij iu sekuestruan 2 kg dhe 200 gramë kanabis e cilësisë më të lartë, në qeska të izoluara të posaçme, që nuk dalloheshin as nga qentë.
