Presidenti Ilir Meta, në Ditën Ndërkombëtare të Mjedisit, kërkon nga qytetarët që të “zgjohen” për të mos lejuar abuzimin me mjedisin “nga papërgjegjshmëria dhe korrupsioni i vendimmarrësve”.
Kreu i Shtetit ka kërkuar nga të gjithë që të kontribuojmë, për të mbrojtur vendin tonë, pasi Shqipëria është shtëpia jonë e përbashkët.
Një apel që përsëritet shpesh, sikundër edhe nga Meta, është që ta mbajmë vendin e pastër e të gjelbër, për të jetuar edhe më shëndetshëm.
Ai thekson ndër të tjera se do të jetë në mbështetje të shoqërisë civile, aktivistëve, pasi duke mbrojtur mjedisin, mbrojmë të ardhmen e Shqipërisë.
Statusi
Sot, në Ditën Ndërkombëtare të Mjedisit, apeli im është të zgjohemi për të mos lejuar më që keqmenaxhimi i mbetjeve urbane dhe ndotja e ajrit të dëmtojnë jetët tona, që betoni të zhdukë hapësirat dhe kurorat e gjelbërta të qyteteve, që lejet abuzive dhe papërgjegjshmëria të sharrojnë pyjet e jashtëzakonshme, malet t’i kthejnë në gurore, detin ta ndotin dhe bregdetin ta shkatërrojnë, që HEC-et dhe shfrytëzimi pa kriter të rrezikojë zhdukjen e Vjosës, Valbonës dhe shumë lumenjve përrallorë që kërcënohen nga papërgjegjshmëria dhe korrupsioni i vendimmarrësve.
Shqipërisë nuk i mungon asgjë për të qenë “diamanti” i Mesdheut dhe Europës! Por të gjithë bashkë duhet të kontribuojmë për të mbrojtur çdo dhuratë që na ka falur Zoti! Shqipëria është shtëpia jonë e përbashkët! Ta mbajmë të pastër e të gjelbër, dhe një vend të mirë e të shëndetshëm për të jetuar! Do të jem në mbështetje të shoqërisë civile, aktivistëve të ndershëm e patriotë dhe çdo komuniteti që duke mbrojtur mjedisin dhe bukuritë natyrore mbron të ardhmen e begatë të Shqipërisë!
