Prokuroria në Turqi ka kërkuar që aksioneri i kompanisë ajrore “Air Albania”, Sinan Idrizi, të dënohet me 3 deri në 10 vite burg për “Mashtrim të kualifikuar”.
Sipas mediave turke, Idrizi akuzohet nga prokuroria se ka mashtruar biznesmenin turk Adnan Polat, kur është tentuar shitja e kompanisë GFI Albania sh.p.k.
“Karsmanset” shkruan se Idrizi është ofruar që t’i shesë biznesmenit kompaninë, e cila ishte vlerësuar 17 milionë dollarë. Nga kjo shumë, 3 milionë e 500 mijë do të parapaguheshin nga blerësi, teksa kompania do t’i nënshtrohej një kontrolli sa i përket bilanceve të saj dhe sigurisë.
Si garanci për procesin thuhet se është zhvilluar një takim mes Idrizit, Polat dhe kryeministrit Edi Rama në 3 nëntor të vitit 2016. Më 24 nëntor 2016 palët kanë nënshkruar “Kontratën e Karzit” dhe u deklarua se Polat depozitoi 3 milion 500 mijë dollarë në llogarinë e Idrizit.
Por kompania rezultoi të kishte probleme gjatë kontrollit, kështu që marrëveshja nuk shkoi më tej. Adnan Polat pretendon se atij nuk i është kthyer shuma prej 3 milion 500 mijë dollarësh. Biznesmeni turk akuzon Idrizin se ka përdorur emrin e kryeministrit Rama, për ta bërë të besueshme kompaninë e tij.
